ايها الساده ايتها السيدات
ان كنتم هوانم او بشوات
ان كتم غلابة او بكوات
انسوا اللي فات
اصل اللي فات مات
وادخلوا جوه
واقفلوا البلكونات
وااقفلوا الصالونات
والدش واللمبات
والترانسزتور والراديوهات
التلفيزيونات السوني
اللي من ايام السادات
واحرقوا كل الفلوس
والقرشينات
ان كانوا ملاليم
او الوفات
اصل اللي فات مات|
وانسوا كمان الوقت
وارموا كل الساعات
انسوا عقاربها
والمينا واللفات
العرض خلاص انتهى
هيتعاد خمس مرات
مره ف التحرير
وراها هتفات
ومره ف الجامع
ورها تكبيرات
ومرهف الشارع
ايام الانتخابات
ومره ع القهوة
مصحوبة باللعنات
ومره واحده اخيرة
ف البارات.. والكابريهات
والنوادي.. والديسكوهات
ودي للناس الرايقة
ومعاها طرقعة كؤوس
ورقاصات
ودي جي
وعربيات
اما الاستوديوهات
فيها دقون وحجاب وشعر
ونقار ديوك ونضارات
وكله ع الشاشات
كله كلام سفسطه
عاش الزعيم سقراط
اصل اللي خلف ما مات
بس الولد مات
مات وادفن معاه
سبع لعنات
لعنة بلد
لعنةولد
لعنة رئيس
لعنة خسيس
لعنة قلم
لعنة علم
والسابعة لعنة شتات
واللي خاف سلم
خايف من الاثبات
اثبت لمين يا وطن
وانت ف طريق متاهات
بص ف اخر النفق
تلقى ضلال اللي فات
بس اللي فات مات
هاثبت....
وآدي الاثبات
لو ع الهرم والمعبد
ف يوم هيبقوا فتات
مبروك عليك اللي فات
ومبروك علينا الفتات
باكتب تاريخ اتخنق
من خنقة الصفحات
جاااااااامد من يومك يا مراد بجد روعه
ردحذف